فضفضة مستوحاة من وحل الواقع

شعب متورط و مشنشل بالديون 

واحد بدو يشتري شاشة لمس وواحد بدو يتفشخر بالايفون 

و الناس مرمضنة و بتاكل مليون صنف و ميت لون 

و الفقير مشكلتو يلاطش على اكل بين هون و هون 

و بدهم كونديشينات و مراوح 

و الفقير بين الرجلين رايح 

مسلسلات رمضانية 

هاي بدها تتجوز و هاي ع الشاشة بس بدها تتبروز 

و اغاني دينية و تضرع لله كلو مشان بالفن يبرّز 

و كوميديا هزلية مشان تسلي ساعاتك الرمضانية الخالية 

و القران على الرف مصفوف للاوقات الضرورية 

و الشباب و البنات بيحبو بالمولات و الكافيهات قبل الافطار 

و الصيام مع كلام الحب و الغرام .. ما بحط بزمتي بس على الاغلب بيكون طار 

و الناس رايحة على الدكاكين تشتري و تتبضع 

بدل ما يحسو انو رمضان بيحسو متل اللي رح يتعرضو لكارثة او اعصار

و حملات احسان من هون و فوازير حليمة من هناك 

و زهرة و ازواجها على الشاشة .. و قصي خولي و اصحابو 

مثال للشاب المنحصر في دائرة الهلاك 

و كل حياتنا محورها المسخرة و الاكل و الحب و الغرام 

الناس نسيت انو في ناس نفسها تشوف الدنيا 

و نحنا نسينا انو رمضان نزل و اجا بديننا 

مشان نزيد لاخرتنا و نجمعلها من هالدنيا  

و الله الوضع مزري كتير صار 

اضطرني انظملكم قصيدة من قلبي 

لانو اكتر من هيك عالمواضيع ما في مجال للانتظار 

اتمنى ما اكون تقلت دم عليكم 

و ما زودتها على الطبقات اللي عم تعيّش حالها بعالم اخر 

بس متأكدة انا انو ...  كتير كتير على الفيقة هالعالم رح يتأخر